გუშინ, 2025 წლის 21 აგვისტოს, „საერთაშორისო გამჭვირვალობა – საქართველომ“ ფოსტის მეშვეობით პასუხი გაუგზავნა ივანიშვილი-კუპრაშვილის ანტიკორუფციულ ბიუროს.

კითხვაზე, თუ რატომ არ დარეგისტრირდა „საერთაშორისო გამჭვირვალობა - საქართველო“ ე.წ. ფარას კანონით გათვალისწინებული მოთხოვნების შესაბამისად, ჩვენი პასუხი შემდეგია: 

• არც ამერიკული FARA და არც მისი ქართული თარგმანი არ ვრცელდება სამოქალაქო საზოგადოების ორგანიზაციებზე, შესაბამისად ეს კანონი ჩვენ არ გვეხება.
• ხელისუფლება აპელირებს, რომ ე.წ. ქართული ფარა ამერიკული ფარას ანალოგია, თუმცა „საერთაშორისო გამჭვირვალობის“ აშშ-ს ფილიალი ამერიკულ ფარაში რეგისტრირებული არ არის.
• ივანიშვილი/კუპრაშვილის ანტიკორუფციული ბიუროს უფროსის ქმედებები ჩვენი ორგანიზაციის მიმართ არის უკანონო. მან საკუთარ თავს მიანიჭა უფლებები, რაც კანონით გათვალისწინებული არ არის.
• „საერთაშორისო გამჭვირვალობა – საქართველოს“ საქმიანობა, 25 წელზე მეტია არის, კორუმპირებული ჩინოვნიკების გამოვლენა და კორუფციასთან ბრძოლა, არჩევნების დროს დარღვევების გამოვლენა, უფასო იურიდიული კონსულტაციებით ათასობით მოქალაქის დახმარება, მიწის რეგისტრაციაში დახმარება, ასობით უკანონოდ გათავისუფლებული საჯარო მოხელის დახმარება, სახელმწიფო ინსტიტუტების და რეფორმების ხელშეწყობა, მედიის წარმომადგენელთა უფლებების დაცვა, საჯარო სამსახურის შესაძლებლობების განვითარება და საქართველოს ევროატლანტიკური ინტეგრაციის ხელშეწყობა.
• ივანიშვილი/ კუპრაშვილის ბიუროს ამ ქმედებების მთავარ მიზანს, ქართული სამოქალაქო საზოგადოების დევნა წარმოადგენს. ასევე, მათი მიზანია საქართველოში რუსული ტიპის კლეპტოკრატიული მმართველობის სისტემის დამყარება.