30 ოქტომბერი, თბილისი

გადამზიდავი კომპანიები ამ გამაფრთხილებელი გაფიცვით გამოხატავენ პროტესტს საქართველოს ეკონომიკისა და მდგრადი განვითარების სამინისტროს მიერ შემუშავებული  „ფოსტის შესახებ“ კანონპროექტი [1]ს გამო, რომელიც ბაზრის ამ სეგმენტზე ეკონომიკურად დაუსაბუთებელი სახელმწიფო რეგულირების შემოღებას ითვალისწინებს. ამ კანონპროექტით პრაქტიკულად ხდება ქვეყნის ეკონომიკის (როგორც ევროპული ორიენტაციის ეკონომიკის) მიმართულების ცვლილება.

,,ფოსტის შესახებ’’ კანონპროექტით შემოთავაზებული რეგულაციები:

– პირდაპირ ეწინააღდეგება თანამედროვე საერთაშორისო პრაქტიკას და საქართველო - ევროკავშირის ასოცირების ხელშეკრულებით აღებულ ვალდებულებებს;

– გამორიცხავს საფოსტო მომსახურების ბაზარზე თავისუფალი და სამართლიანი კონკურენციის არსებობას და ხდება ბაზრის მონოპოლიზაცია ,,საქართველოს ფოსტის““ მიერ;

• აღნიშნული რეგულაციების შემოღება ბაზრის ამ სეგმენტზე მოქმედი საერთაშორისო კომპანიების (DHL, TNT) და ორმოცამდე კომპანიის, რომელიც დღეს საქართველოს ბაზარზე ოპერირებს, საქმიანობაში სერიოზულ ფორმალურ/ბიუროკრატიულ ბარიერად  იქცევა  და ეს კომპანიები იძულებული გახდებიან საქართველოს ბაზარი  დატოვონ (მსგავსი შემთხვევა 2005 წელს მხოლოდ თურქმენეთში დაფიქსირდა). მსოფლიოში ცნობილი უმსხვილესი გადამზიდავების მიერ ბაზრის დატოვება კი უარყოფითი ეკონომიკური შედეგების მომტანი იქნება არამარტო ამ კონკრეტული სფეროსათვის, არამედ მთლიანად ეროვნული ეკონომიკისთვის.

,,ფოსტის შესახებ’’ კანონპროექტზე ევროკომისიის მიერ მოწოდებული იქნა შენიშვნები (მ.წ. ივლისში) და სამინისტროს მისამართით მოხდა იმის მითითება, რომ კანონპროექტის არსებული ვერსია ეწინააღმდეგებოდა საქართველო - ევროკავშირის ასოცირების ხელშეკრულებით ქვეყნის მიერ აღებულ ვალდებულებებს. მიუხედავად აღნიშნულისა, სამინისტრომ დღემდე არ უზრუნველყო კანონპროექტის გადამუშავება ევროკომისიის მიერ მოწოდებული შენიშვნების მიხედვით.

გამაფრთხილებელი გაფიცვის მიზანია მოვუწოდოთ

საქართველოს ეკონომიკისა და მდგრადი განვითარების სამინისტროს, რომ უზრუნველყოს ,,ფოსტის შესახებ’’ კანონპროექტის გადამუშავება ევროკომისიის მიერ მოწოდებული შენიშვნების შესაბამისად:

• კანონპროექტის რეგულირების სფეროდ განისაზღვროს მხოლოდ უნივერსალური (მინიმალური მოთხოვნების შესაბამისი) საფოსტო მომსახურება;

• საკურიერო და დაჩქარებული საფოსტო მომსახურების ბაზრებზე შენარჩუნდეს ლიბერალიზებული ბაზრის შესაბამისი საკანონმდებლო ჩარჩო;

• უნივერსალური საფოსტო მომსახურების გამწევი ეროვნული  ოპერატორის (კანონპროექტის მიხედვით „საქართველოს ფოსტა“) შერჩევის პროცესში დაცული იქნას გამჭვირვალობისა და ობიექტურობის მოთხოვნები.